اتنين سمعه تقيل اوي

الأول : الاتوبيس ده بيروح مصر الجديدة؟
الثاني : على الحديدة !!... ليه انت طالب احسان؟
الأول : بذرة الكتان !! لا ..دي تلاقيها عند العطار
الثاني : جزار !! اه.. قوللي كده.. عايز تشتري لحمة؟
الأول : معك حق.. الدنيا زحمة.. علشان ده ميعاد خروج الموظفين
الثاني : نور الدين !! لا والله.. ماعرفوهش
الأول : ما بتشربوش!! ليه.. كفا الله الشر؟
الثاني : رأس البر !!!.. ده مصيف هادي
الأول : عايز تركب للمعادي؟.. دي منطقة جميلة
الثاني : بليلة ؟!! انت شكلك كده جعان
الأول : عيان ؟!!! أي والله.. انت باين عليك عيان.. طيب ما تروح للدكتور
الثاني: الحنطور !! ده احسن من الأتوبيس، وبيوصلني لحد الباب
الأول : هباب !!! وانا اللي كنت فاكرك محترم
الثاني : اتخرم !! هو مين ؟؟
الأول : عاوز اسبرين ! ليه انت عندك صداع ؟
الثاني : قراع !!! يانهار اسود.. ده مرض خطير
الأول : لا والله مش عايز؟ وبعدين مش بأحب الفطير.. تقيل على المعدة وتمنه غالي
الثاني: خالي.. انت تعرف خالي ؟ ده راجل كبير في السن
الأول : الجن.. نهارك مش فايت.. انت عليك عفريت !؟
الثاني : لا والله.. ممعاييش.. انت عايز الكبريت ليه..؟ عايز تولع؟
الأول : أدّلع ! أدّلع عليك انت !؟ انت ما تملاش عنيّا
الثاني : يقبضوا عليا !! ليه !؟
الأول : انت غريب يا راجل انت..شكلك شحات(يدفعه من القميص)
روح اشتغل شغلة تاكل منها عيش
الثاني : خيش !! والله ده صوف انجليزي
الأول: بنتك زيزي !!! ربنا يخلّي
الثاني : إنتاج محلي !!! ده مستورد


يمر شاويش من بتوعنا.. يلفت انتباهه الحوار فيقول: بتعمل ايه يا جدع منك له
!!!


الاتنين: مافيش يا شاويش ...احنا مستنيين الأتوبيس
الشاويش : نهاركم مش فايت.. جواسيس !!! قدامي على القسم

ههههههههههههههههههههههههههه
جامدة مواضيعك كلها ملهاش حل ماشاء الله

بس اللي عجبني حتت الشويش اللي في الاخر

الف شكر علي الحوار اللي حضرتك جبتيه يا بشمهندسة

ميرسي يا جماعه على ردودكم الجامده ديه ويارب دايما كده اعرف اجيبلكم مواضيع تعجبكم

توبيك حلو اوووووووى وبجد زى ما البشمهندسين قالوا احلى حته بتاعت الشاويش

شكرا على المرور ويارب دايما اعرف اجيب مواضيع تعجبكم