تتجوزينى

تتجوزينى
تتجوزيني ؟
ـ أفندم ؟
ـ بقولك تتجوزيني ؟
ـ !!!!!


ـ تتجوزيني ؟
ـ لا !
ـ ليه ؟
ـ بصراحة كدة شكلك مش عاجبني ..
ـ إزاي يعني ؟
ـ يعني .. أصل أنا ليا مواصفات معينة لفارس أحلامي .
ـ مواصفات معينة ؟ .. هو انتي هتتجوزي عربية ؟
ـ لا ! .. بصراحة كدة .. إنت مش فارس أحلامي اللي باتمناه !


ـ تتجوزيني ؟
ـ إيه ده ؟ شكلك اتغير !
ـ إيه رأيك ؟
ـ واو .. شعرك بقة ناعم ! .. دي باروكة ؟
ـ أيوة !
ـ ودي عدسات خضراء ؟
ـ أيوة !
ـ واو ! .. بس بجد .. بقيت وسيم ! .. واو ! ده انت بقيت شبه نكولاس كيج !
ـ مين عباس كيج ده ؟
ـ عباس ؟!! ياي ! .. إيه عباس دي ؟ اسمه نكولاس ..
ـ مين نكولاس ده ؟
ـ بقة مالكشي في السيما وجاي تكلمني ؟ .. ياي !


ـ تتجوزيني ؟
ـ انت لسة ليك عين تكلمني ؟
ـ أيوة .. أنا عرفت مين بنكرياس كيج ده !
ـ أولاً : اسمه نكولاس كيج ..
ـ أيوة أيوة .. كنت هاقول اسمه صح .. بس اختصرته .. ده ممثل !
ـ ممثل إيه ؟
ـ ممثل أمريكاوي !
ـ أمريكاوي ؟! .. إخّييي ! .. اسمه أميريكان يا بابا ! .. ما تبقاش دونكي !
ـ دونكي دي تبقى شتيمة ؟
ـ أوف كورس !


ـ تتجوزيني ؟
ـ عندك عربية موديل كام ؟
ـ موديل دي تبقى شتيمة ؟


ـ تتجوزيني ؟
ـ قوللي الأول .. حاطط أنهي نغمة في الموبايل بتاعك ؟
ـ نغمة دي تبقى شتيمة ؟


ـ تتجوزيني ؟
ـ ما قلتليش .. إنت بتشتغل إيه ؟
ـ أنا -بلا فخر- عاطل !
ـ عاطل ؟ .. ياي ! ..
ـ مش أحسن من اللي ما بيشتغلش ؟
ـ لا !
ـ يعني مش هتتجوزيني ؟
ـ لا !
ـ كدة أنا أزعل !
ـ ما تزعلش يا بابا ! .. خليك فريش !
ـ ماشي .. ماشي .. بس قوليلي ..
ـ إيه ؟
ـ فريش دي تبقى شتيمة ؟


ـ تتجوزيني ؟
ـ لقيت شغل ؟
ـ أيوة طبعًا .. سنتين وأنا بادور .. أخيرًا لقيت ..
ـ وإيه هو ؟
ـ سواق تاكسي .
ـ ياي ! .. مش مكسوف وانت بتقولها ؟
ـ فيها إيه ؟ العمل شرف .. وكلها كام سنة وأجمع مبلغ كويس ..
ـ شرف ؟ جتك القرف !


ـ تتجوزيني ؟
ـ جمعت مبلغ كويس ؟ ـ طبعًا .. مبلغ كبير جدًا ..
ـ قد إيه يعني ؟
ـ ألف جنيه !
ـ نعم ؟!!! .. ألف جنيه دول تروح تسرح بيهم ببطاطا ..
ـ يعني موافقة ؟!
ـ روح اتنيل .


ـ تتجوزيني ؟
ـ عندك شقة ؟
ـ طبعًا ! .. أودة على السطوح ..
ـ نعم ؟!! ..
ـ إيه المشكلة ؟! .. أحسن ما ننام في الشارع !
ـ في الشارع ؟! .. إيه الألفاظ السوقية دي ؟! ياي ! .. لازم يا بابا تجيب شقة .
ـ طيب .. كلها كام سنة وأجيبلك أحسن شقة في الدنيا .
ـ وهتجيبها في جاردن سيتي ولا في الزمالك ؟
ـ لا .. في الأهلي .. هيهع هيهع هيهع !


(بعد سنوات)
ـ تتجوزيني ؟
ـ جبت الشقة ؟
ـ أيوة ! .. الحكومة بتبني شقق للشباب وأنا خدت شقة .. صحيح إنها اتأخرت لسبع سنوات .. لكن المهم إنها جات .. !
ـ ـ فانتاستيك !
ـ بس الشقة ناقصة حاجة .
ـ إيه هي ؟
ـ مفيهاش حمام !
ـ امشي من قدامي ! .. مش طايقاك !


ـ تتجوزيني ؟
ـ إنت تاني ؟
ـ جبتلك حمّام إنما إيه !
ـ خليه ينفعك !
ـ ليه بس ؟ .. ده ينفع لينا احنا الاتنين !
ـ وأنا مالي ؟
ـ مش عاجبك .. مش مشكلة .. أكتبه باسمك !


(بعد سنين)
ـ هتتجوزيني ولا أولع فيكي ؟
ـ ومالك محروق كدة ؟
ـ حكايتنا طولت قوي .. طولت أكتر من اللازم !
ـ أوكي .. بس ممكن أعرف حاجة ؟
ـ إيه ؟
ـ إنت ليه متمسك بيا أوي كدة ؟
ـ أصل .. أصل ..
ـ أصل إيه ؟
ـ أصل أنا بحُبك (بضم الحاء) !
ـ بحُبك ؟!! .. إيه بحُبك دي ؟! .. إسمها بحِبك (بكسر الحاء) ! .. بعدين خليك روش وقول I love you !
ـ ماشي .. بس قوليلي ..
ـ نعم ؟
ـ روش دي تبقى شتيمة ؟


ـ تتجوزيني ؟
ـ بصراحة .. في حاجة كنت عاوزة أقولهالك من زمااااااان .
ـ إيه ؟
ـ أنا بصراحة .. مش شايفة إن في حد في العالم يستاهلني !
ـ يا سلام ! .. ليه ؟
ـ عشان أنا جميلة .. خفيفة الدم .. رشيقة .. رقيقة ..
ـ رقيقة ؟! .. ده انت بدأتي تقشفي !
ـ فشر !
ـ فوقي لنفسك .. العمر بيجري ..
ـ أنا مصرة على رأيي !
ـ يعني إيه ؟
ـ يعني اقطع معايا !
ـ بعد كل السنين دي ؟! .. بعد كل الحب ده ؟!!
ـ بلاش تراجيديا من فضلك !
ـ ماشي .. بس قبل ما أمشي عاوز أسألك سؤال واحد بس ..
ـ إيه هو ؟
ـ تراجيديا دي تبقى شتيمة ؟


( بعد سنين)
ـ تتجوشيني ؟
ـ إيه ؟
ـ تتجوشييينييييييي ؟
ـ إنت مين ؟
ـ أنا حبيبك يا هبلة .. البشي النضارة عشان تشوفيني !
ـ طيب شاعدني عشان ألاقي النضارة !
ـ آهي على الترابيزة قدامك !
ـ فين ؟!!
ـ لا دي نظارتي أنا !
ـ أيوة لقيتها ..
ـ البشيها بقة !
ـ ططييبب !
ـ عينيكي فوق شوية .. ده بقك ..
ـ طيب لبشهالي إنت !
ـ عقبال ما البشك الدبلة !
ـ ما تكشفنيش ! .. كنت بتقول إيه بقى ؟
ـ كنت بقول تتجوشششيييينيييييي ؟
ـ أكوشك ؟ .. إزاي ؟
ـ يا ولية مش تكوشيني .. تـ .. تـ .. جـ .. و.. شـ .. يـ .. نـ .. ي ؟
ـ دي شتيمة ؟
ـ لاااااء .. بقولك تتجوشيني ؟!!
ـ آه !! .. أجوشك !
ـ بالضااااابط ! .. هاه ؟
ـ شيبني أفكر !
ـ أشيبك تفكري ؟! .. ده انت هتموتي خلاش !
ـ لا .. شيبني أفكر بش !
ـ ربنا يوفقك !
ـ إيه ؟ ـ ربنا يوفقك !
ـ بتقول إيه ؟
ـ ربنا ياخدك !


(على فراش الموت) ـ تـ … كوح .. كوح .. تتـ .. كوح كاح كيح .. تتكو .. كوح .. كوح .. تتكوشـ .. كوح كوح .. يني ؟!!
ـ مش شامعة ! ـ بـ .. قوللـ .. كوح .. كوح .. بقولك .. تـ .. تـ .. كوح .. كوح .. تتجوشيـ .. ؟ كوح .. كوح ……. ـ أجوش مين ؟!!!
ـ هـ .. و.. ه .. كووح كوح كاح .. هوه إنتي .. كوح كوح .. معرفتيـ .. ش .. كوح كوح كيح .. ميـ .. كوح .. مين ؟!!
ـ إيه ؟ ..
ـ لا .. كوح .. أبدًا .. كوح .. كنت … كح كح .. بأكح !!
ـ كنت بتكح ؟!!!! .. شلامتك !! .. ما قلتليش ليه ؟!
ـ هو .. كوح .. إنتي .. لشة .. عارفـ .. ـة .. كوح كوح !
ـ بتقول إيه ؟!!
ـ يا .. ولية .. كوح كوح .. ردي .. كوح كوح .. عليا .. !! .. تـ .. تـ .. جو.. شيـ .. كوح كوح كوح كوح .. نـي ؟!!
ـ أجوشك ؟!! .. طب بش خد الدوا الأول !
ـ يا وليـ .. ـة .. كوح .. كوح .. أنا .. كوح .. كوح .. هتتجوشيـ .. كوح كوح كوح .. ـني ؟!!
ـ أيوة يا حاج .. موافقة !! .. موافقة إنك تتكوشني ..
ـ أخيـ….كوح كوح ..راااااً !! .. كوح كوح !! .. كدة أموت .. كوح .. كوح .. وأنا .. كوح .. مطمئن ومرتاح !! .. الودااا .. كوح ..ع ع ع ع ! ـ يا حاج .. يا حاج .. لااااااااااااااااااااااااااااا !!
يا رب تعجبكم

هههههههههههههههههههههه

بجد جااااااااااااااااااااااااااااامده جدا بس طويله اوى
انا لو مكانه كنت قتلتها وخلصت ولو مكانها كنت قتلته وخلصت

ههههههههههههههههههههههههههههههههههههههههههههههه
حلوه اوي القصه دي يابشمهندس
ومظنش ان في حد يستني حد الفتره دي كلها
ولوكنت مكانه لكنت قتاتها

جامده جدااااااااااااا القصه دى
واكيد مافيش حد كده الايام دى

قال تتكوشينى قال
هههههههههههههههههههههه

قصه هاااايله

والحمد لله انه مات قبل مايعملوا الفرح بدل ما كانوا همه الاثنين يتوكلوا على الله عند المصوراتي قال ايه مكاستحملوش فلاش الكاميرا جاتلهم سكته قلبيه (هههههههههههههههههه)

ايه يا عم الناس اللي انتا جايبهم دول دول انتهت صلاحيتهم

ايه يا عم هتستنا لحد ما تعجز علشان تتجوز ولا ايه؟؟؟؟

القصة هايلة يا بشمهندس

بس الراجل كان ناوي ينتحر لو هيقا وافقت قبل ما يعجز ولا ايه؟؟؟؟

هههههههههههه

كل ده صبر يا بشمهندس لو انا كنت قتلتها ايه الحب ده الي يعمل بصحبه كيدا هههههههههههههههههه بس موضوع ظريف

موضوع جامد ياسولم
بجد تحفة
بقلك ايه ماتيجي تغني عليها اغنية البنت دي ؟؟؟
هههههههههه

ههههههههههههههههههههههه
لا بجد جامده
بس انا عايز أسأل سؤال
في واحده في الدنيا تستاهل ان الواحد يفضل يستناها طول العمر؟؟؟؟؟؟؟؟؟؟
انا عن نفسي معتقدش

ميرسي علي رودوكم يا باشمهندسين

[size=18]اية الحاجات الجامدة دى ياسمسم اية كدة اديها فى المفيد[ /size]

موضوع جااااااااااااااااااااااااااااااااامد اوي
انا لو مكانة كنت قولتلها تجوشيني

ههههههههههههههههههههه موضوع جامد يابشمهندس
بس اية كمية الكحة اللى فى الاخر

الموضوع هايل فعلا يا بشمهندس

ميرسي اوي