شباب سحرهم جو الكليه

السلام عليكم ورحمة الله وبركاته

طبعا قبل ما اتكلم فى الموضوع كلكم عرفينه وفهمينه وعلى رأى المثل ( الجواب باين من عنوانه )

احنا الشباب الى سحرهم جو الكليه . كنا فى الثانويه مفيش ولد يستجرى يكلم بنت او بنت تستجرى تكلم ولد حتى ولو فى حدود الادب وده لاننا كنا بننكسف من بعض .

لكن اول ما دخلنا الكليه حسينا ان الموضوع سلطه كل بنت مع ولد وبيتكلمو كلام فاضى يا ريته كلام فى حدود العلم .

اول ما دخلنا الكليه بقى اكل البيت مش حلو لكن اكل المطاعم ياااااااااااااااااااااه جميل اوى شيك ولذيذ وكله عك فى عك .

اول ما دخلنا الكليه بقى لبسنا اوووووووووف مش عصرى ومش شيك ومينسبناش لانه لبس محترم لكن اللبس الى يناسبنا هو لبس البناطيل والباضيهات الضيقه .


اول ما دخلنا الكليه لازم كل واحد وواحده تمشى الهاند فرى معاها وقاعده تسمع اغانى لان ده بيديهم شياكه واناقه ويسلام لما يبقى لونها ماشى مع لون الطقم تبقى تحفه .

اول ما دخلنا الكليه بقى الميكروباص اووووووووف خنيق وزحمه ومينسبناش كطلبه لكن التاكسى جميل ومريح وياسلام لما نضغط على بابا انه يجبلنا عربيه عشان نبقى عيال كوووووووووووول.

اول ما دخلنا الكليه بقى معظم كلمنا بالانجليزى لانه بيخلى كلمنا شيك اوى ويحسسنا اننا عصريين لكن العربى لا ( يا شباب النبى العربى وكل الرسل والانبياء).

وحاجات غيرها كتير بجد احنا اتغيرنا بس يا خساره اتغيرنا للاوحش مش للاحسن ياريت نعدل من نفسنا شويه وبجد انا اسفه ومحدش يزعل من كلامى بس دى وجهة نظرى واكيد وجهة نظركم كلكم .

بجد نفسى كل واحد فيكم يقول هل الكلام ده ينطبق عليه ولا لا ؟ ويا ترى هو راضى عت التغير ده ولا لا ؟ بس بصراحه .

علي فكرة عندك حق
بس كل واحد يختلف حسب كل مكان
انا عيشت في القاهرة تقريبا حياتي كلها
كون اني اكلم بنت دي حاجه عادية
بس في ناس مكنتش بتعمل كده
واللي معملش بيجرب
هي دي الحكاية

الموضوع هاااااااااااااااااااااااااااااااايل يابشمهندسه
وبجد فعلا كتير منا اتغير لما اتنقل من الثانويه للكليه بس مش كل الناس كده
في ناس اتغيرت بس لسه متمسكه بعادتها وتقاليدها والقيم اللي تربنا عليها
وفعلا في حاجات من اللي انتي دكرتيها منطبقه عليا
ومش معني اننا بندكر كلمات انجليزي في تصرفتنا اننا نسينا اننا عربين
بس احنا بنحاول اننا نبقي لبقين لان اي شركه بتشغل اول حاجه بتبص ليها اللباقه ويعرف انجليزي ولا لا
وبهنيكي مره تانيه علي موضوعك

شكرا لمرورك يا باشمهندس اسلام انت والباشمهندسه real love
بس احب اقولك يا باشمهندس ان العادات والتقاليد الصحيحه مش بتختلف من مكان لمكان لان جدى وجدك كانو زى بعض وانا مش بعارض انك تكلم بنت ولكن بعارض المواضيع الى بتتكلمو فيها وعدم وضع حدود للكلام ده وهو ده الى انا طلباه ان يكون فى حدود فى الكلام مش اكتر

والله من الطبيعي إن إي إنسان طبيعي يتغير إذا تغيرت كل الظروف إلي حوليه تغير المكان إلي بيدرس فيه وتغير صحابه وتغير المواد الدراسية ده شيئ كافي إنه يغير أى إنسان

حكاية إنه يتغير للاحسن أو للاوحش ده حاجه خاصة بيه إحنا مش في كلية أداب ولا تجارة ولا حقوق عشان نبص ع الناس ده لابسه ايه وده حاطط الhand free ولا لا وده بيركب taxi ولا ده بيركب micro bus أظن إن في حاجات في الكلية أهم من كده بكتير ممكن نفكر فيها وإلي عنده وقت فاضي ومش عارف يعمل ايه يقعد يراقب الناس أنا اعرف إن كل واحد حر يعمل في نفسه إلي هو عيزه وفي الاخر ربنا الي بيحاسب وأظن للمره الثانيه إننا في كلية الحاسبات وتكنولوجيا المعولمات معندناش وقت فاضي عشان نعمل كده
بصراحه كاملة الموضوع مش عاجبني وياريت نتكلم في حاجه مفيدة عن كده

كل ثانيه في الدول الغربية بيظهر برنامج جديد

كل ثانية العالم بيتغير وكل ثانية الناس بتفكر في إختراعات وأجهزة جديدة بعد كل ده إحنا بنروح الكلية عشان نبص على الناس

ياريت نقدر إسم الكلية الي إحنا فيها ونحاول نحاااااااااااااااااول نعمل أى حاجه مفيدة عشان يكون لينا كيان ووجود بدل محنا بنبص على hand free

ياريت نسيب الناس في حلها ا ونخلينا في الي إحنا فيه ونحترم عقولنا عشان العالم يحترمنا وكل واحد فيكم رد على الموضوع رد من غير ميفكر

معقول عقولنا فاضية بالطريقة ده معقول مفيش حاجه تشغل عقلنا غير حاجه تافهة ذي كده
د
ياريت الي هيفكر بالطريقة ده الي (جايبانا لوراااااااااااااااا) يحول من الكلية الي إحنا فيها ويشوفله كلية تانيه عشان لازم نقدر الكلية الي إحنا فيها ونحاول بجد نتعلم صح ونعمل حاجه أو نحاول نعمل حاجه

موضوع مش بطال بس يابشمهندسة في طلاب وطلاب وبعدين في اكترهم مش علشان الفشخرة او الكول وما الكول عادي يعني ده واحد متعود انو كده ده واحد مثلا عايش برة وغير جو الي عايشين في مصر بس هوه ده

شكرا لردك الصريح يا باشمهندسه
بس احب اقولك ان دى وجهات نظر واختلاف الاراء لايفسد للود قضيه

واحب اقولك كمان انى كلامى ده مش معناه انى ببص على حد او براقب حد لا التغير ده انا بحسه على اصحابى

واحب اقولك كمان انك يا ريت لما تخدى من الدول فى التغير تخدى فى الحاجات الحلوه مش الوحشه ( وانا عارفه انى دى حريه شخصيه ) بس دى نصيحه للى عايز
وياريت متذكريش كليه اداب او تجاره لان الناس الى فيها مش اقل مننا فى شى ولا هما معندهمش حاجات مهمه بالعكس ممكن تكون حاجتهم اهم مننا


وان كان على الوقت الفاضى الى فى كليتنا فهو موجود بالفعل

والعقليه الضعيفه فعلا هى العقليه الى بتحس ان كل الناس زباله وانها هى الى فى القمه وان كان على رد الباشمهندسين فدى حريه مش انتى برضه بتحترمى الحريات وبلاش نعيب فى حد او فى عقول حد

قبل أى حاجه مفيش أى كلية أحسن من الكلية الي إحنا فيها

ثانيا أنا مقدرة كل كلمة قولتها كويس ومسؤلة عنها لانها الصح والله يا بشمهندسة الوقت الفاضي الي بتقولي عليه هو مش موجود ده موجود عند الي عقولهم فاضية لان الي بيفكروا مش بيبصوا للتفهات ده


ومستحيل تيجي حقوق وتجارة واداب حاجه جنب الي الكلية إحنا فيها ده إذا كنتي مقدرة المكان الي إنتي فيه أما لوة كان غير كده ..............................................(إنتي حرة لأني حقيقي بحترم الحريات كويس أوي)

اولا شكرا لردك يا باشمهندس خالد
ثانيا
انا عرفاكى كويس يا باشمهندسه منار لانك غنيه عن التعريف
وانتى الوحيده الى معجبكيش الموضوع
ومش عارفه ليه بتردى على موضوعى انا بس
وانا شايفه انك مش بتحترمى الحريات ولا حاجه
ودى وجهة نظر متزعليش منى

شكرا على كلامك اوى يا باشمهندسه tweety وبجد انتى قولتى الى انا كنت عايزه اقوله بالظبط بس مكنتش عارفه اوصله

خلاص بقيتوا كلكم صح وأنا الي غلط؟

أنا كل حاجه قولتها مقتنعة بيها ومقتنعة إنها الصح

يا بشمهندسة tweety الرد الي انا قولته كان في نفس موضوع المهندسة forever مخرجتش عنه ولا حاجه
يا ريت يا بشمهندسة forever تقوليلي عرفاني إذاي وياريت تعرفيني بنفسك عشان عيزه أعرفك

يا جماعة احنا مش في حرب وكل واحد له رايه ومقتنع بيه يبقي مفيش حد يزعل من حد لاننا زمايل مش كده ولا ايه
صلوا علي النبي كده واهدوا شوية

ياجماع ياريت براحه شويه انتوا ليه بتكلموا بانفعال براحه خااااااااااااااااااااالص كلنا اخوااااااات هناااا

انا عن نفسى يا جماعه مفيش حاجه والله انا برحب جدا براى الباشمهندسه منار
بس انا مش بحبها تتكلم عن الكليات التانيه بالاسلوب ده لانها كان ممكن يحصلها اى ظروف ( بعد الشر طبعا ) زتتدخل زيهم
احب اقول بس ان الناس الى فى الكليات التانيه مش اقل مننا فى حاجه بس الحظ مش معاهم بس

خلاص يا جماعة حصل خير يا ريت تتكلموا براحه شوية أنا مش بحب العصبية والانفعال

شكرا لردك يا باشمهندس حازم
وعلى فكره يا باشمهندسه منار والله انتى ردك عاجبنى جدا
واحنا بنتكلم براحه ولو عيزانى امسح الموضوع عادى والله هستاذن الباشمهندس اسلام ويمسحه

اصل مش مستهله يا جماعه والله

مع انك يامنار صاحبتي بس انت غلطانة في رايك مع ان بردو المهندسة فور ايفر ماعندهاش حق في كل الكلام لان الاكل في المطاعم دا مجرد ترفية اما بالنسبة للكلام مابين الولاد والبنات صدقيني لسة في ناس محترمة كتير ومقدرة العادات والتقاليد وعلي فكرة مافيش مانع يبقي في كلام بين الولاد والبنات بس في حدود الادب

اولا انا رائي في الكلام ده انه مش مضبوط

لان كل واحد متعود علي حاجة ففي ناس متعودين من زمان انهم يكلمو بنات عادي وفي ناس بدات تتكلم مع البنات في الكلية فكل واحد حسب البيئة
والطريقة اللي كان عايش بيها

و بالنسبة للاكل في المطاعم فده شيء عادي ان الواحد ياكل مع اصحابه و ياكل اكل غير اكل البيت كل فترة كده

و بالنسبة للبس فالواحد اللي متوعد علي لبس مش هيفريه لانه مثلا متعود يجيب لبس معين في دماغه

و بالنسبة للهند فري ففي ناس هيا كدا من الاول مش بتجيبه منظرة

و بالنسبة للمكروباص ففي ناس متعودة انها تركب عربيات علطول بس العربية مش متوفرة فبتركب تاكسي لانها ما تعرفش تركب مكروبصات

او يكونو متعودين ان معاهم عربية بس العربية مش معاهم دلوقتي فبيركبو تاكسي ايه المشكلة بقا

و بالنسبة للانجليزي فده بسبب المواد اللي بناخدها كلها بالانجليزي

وده رائي في الموضوع وياريت ما اكونش زعلت حد

بصراحة الموضوع حلو وواقعىىىىىىىىىىىىىىىى جدا انا عن نفسى ما ببطلش كلام وتريقة على اللى رايح واللى جاى ههههههههههههههههههههههههههههههههههههههههههههه اما بالنسبة للتغير ففعلا اللى عنده مبدا مبيغيرووووووووووووووووووووووووووووش واللى معندهوش كل يوم شغال بمبدا على ما الشحن يخلص بيفضى البطارية ويملها بمبدا جديد هههههههههههههههههههههههههههه تصوير بليغ والله

يا جماعه الموضوع اخد اكتر من حقه وفى الاول والاخر دى مجرد وجهة نظر
واختلاف الاراء لايفسد للود قضيه
الحاجات الى انا اتكلمت عنها انا عارفه انها عادى بس مش هتبقى عادى لو مكنتش فى حدود المعقول والادب
انا عن نفسى بكلم زمله ليا فى الكليه بس فى الحدود مش اكتر
انا بركب تاكسى بس فى وقت الحاجه مش على الفاضى والمليان
انا بسمع فى الهاند فرى بس ده لما يبقى الى جنبى مش عايز يسمع مش معلقاها فى رقبتى على طول ويمكن ميكنش عندى تليفون اصلا
والاكل فى المطاعم باكل بس مش ابقى راجعه البيت خلاص وهاكل انا واهلى على طربيزه واحده واروح اكل فى مطعم
وحاجات كتير متفهموش موضوعى غلط